San Antonio de Padua: Bisaya Novena Mass

San Antonio de Padua GKK

Deca Homes Resort & Residences

Mintal, Davao City

Pasiuna

(Novena Mass-30 May 2013)

Maayong gabii kanatong tanan!

Ato nang nabatasan nga ang pagnobena alang sa patron, maoy pinaka-importanteng matang nga pagpangandam alang sa pagsaulog sa kapistahan.  Usa kini ka tradisyon nga nasunod nato gikan pa sa atong mga katigulangan sukad pa sa kaniadto. 

Isip unang gabii karon sa atong pagnobena, ato kining gihatagan og kamahinungdanon pinaagi sa paghalad nato niining Santos nga Yukaristiya.

Agi’g pagsugod, manindog kita og atong awiton ang pasiunang awit.

Katilingbanong Pag-ampo

(Novena Mass-30 May 2013)

(Pari):              Sa dakung pagsalig nato sa atong langitnong Amahan, atong ipadangat ngadto kaniya ang tanan natong mga panginahanlan. Sa matag pag-ampo, kita moingon:

“Ginoo, lig-ona kami diha sa pagtoo”

(Magbabasa):

·        Nga ang mga nagdumala sa atong Simbahan, sa kanunay unta silang magmatinod-anon sa ilang mga saad sa napili nilang bokasyon.  Mag-ampo kita: (R)

·        Nga ang mga bag-ong napiling lideres sa atong nasud, magmakugihon unta sa ilang mga buhat sa pagpangalagad sa katawhan.  Mag-ampo kita: (R)

·        Nga ang tanang katawhan makabaton unta og lig-ong pagtoo, ilabina niadtong mga nahiagom og mga pagsulay sa kinabuhi, aron ilang masinati ang matuod nga mensahe sa gugma sa Dios. Mag-ampo kita: (R)

·        Nga ang mga masakiton, mga nag-antos sa kawad-on, mga nawad-an og mga minahal sa kinabuhi,  dili unta mawad-an sa paglaum, pagsalig ug pagtoo sa Dios. Mag-ampo kita: (R)

·        Nga ang mga nagduha-duha sa ilang pagoo,  pagahikapon unta sa Balaang  Espiritu  aron  madasig  sila  sa  pagpaningkamot  sa  pagkat-on nga ikapalambo sa ilang pagtoo. Mag-ampo kita: (R)

(Pari):              Mahigugmaong Amahan, ihatag ang tanang makaayo sa imong katawhan. Tabangi kami nga maka bangon sa among mga kahuyang ug makaalagad kami kanimo diha sa pagtoo.

                        Kini among gipangayo nga puno sa paglaum, pinaagi ni Kristo, among Manunubos.   Amen

Katilingbanong Pag-ampo

(Fiesta Mass-08 June 2013)

(Pari):              Uban kang San Antonio nga atong patron, maghiusa kita sa pagpadangat sa atong mga katuyoan ngadto sa Amahan. Sa matag pag-ampo, kita mo-ingon:

“Ginoo, lig-ona ang among pagtoo”

(Magbabasa):

·        Alang sa mga nangulohan sa atong Simbahan: ang Santo Papa Francis, mga kaobispohan, kaparian ug mga relihiyoso, nga sa kanunay sila kahatagan og dugang grasya aron sa mapadayonon nilang pag-amoma sa katawhan sa Dios. Mag-ampo kita: (R)

·        Alang sa mga bag-ong napiling tigdumala sa atong nasud, nga magmatinud-anon ug magmakatarunganon sila sa pag-alagad sa ilang gingsakupan aron pinaagi kanila, mapadangat sa tanan ang dakung kaayo sa Ginoo. Mag-ampo kita: (R)

·        Alang sa atong Gagmay’ng Kristohanong Katilingban nga mamahimo unta kining lig-ong pundasyon sa atong panaghiusa isip mga matuod nga sumusunod ni Kristo. Mag-ampo kita: (R)

·        Alang kanatong tanan nga madasig unta kita sa pagkat-on sa mga pagtulon-an sa atong Simbahan nga ikapalambo sa atong pagtoo sa Dios.  Mag-ampo kita: (R)

·        Alang sa mga nagmasakit natong kaigsoonan, mga nag-antos sa kawad-on, mga nawad-an og mga minahal sa kinabuhi,  nga dili unta sila mawad-an sa paglaum, pagsalig ug pagtoo sa Dios. Mag-ampo kita: (R)

(Pari):              Mahigugmaong Amahan, ihatag ang tanang makaayo sa imong katawhan. Tabangi kami nga maka bangon sa among mga kahuyang ug makaalagad kami kanimo diha sa pagtoo.

                        Kini among gipangayo nga puno sa paglaum, pinaagi ni Kristo, among Manunubos.   Amen.