Reflection
(5th Sunday of Easter)
Usa ka gabii, miuli ang bana nga hoyhoy
kayo ang iyang abaga ug masulob-on nga miingon sa iyang asawa: “Wala na ko’y trabaho. Na lay-off ko. Unsaon naman nato ni? Unsa ma’y atong buhaton nga kompiskahon man
sa bangko ang atong kabtangan gikan sa balay hangtod ang atoang sakyanan.”
Ang asawa mipahigayon nga nagkanayon: “Apilon ka ba pagkomiska nga akong bana?” “Dili,”
mitubag siya. “Apilon ba ako pagkompiska sa bangko nga imong asawa?” “Dili oy!”
mitubag ang bana. “Aw, kon mao kana, wala ta’y angay’ng
kabalak-an. Kumpleto man gihapon ang atong pamilya; ikaw, ako ug ang atong mga
anak. Walay problema, magsugod ta ug bag-ong sinugdanan! We can start all over
again.”
Pagka-anindot palandongon sa hulagway nga
gipakita sa asawa ngadto sa masulob-on niyang bana. Malaumon gihapon siya
taliwala sa nahitabo sa panginabuhi-an sa iyang bana. Alang kaniya, dili
angay’ng kabalak-an ang mga suliran kay aduna kini utlanan. Ug ang utlanan maoy
mamahimong sukaranan sa paghimo og bag-ong sinugdanan.
Diha sa atong ika-duhang pagbasa, nag
presentar kini ug bag-ong kalibutan (new
world) nga mobarog sa katapusan human gun-obon sa Dios ang dautan ug
magpabilin ang mga maayong katawhan. Sa atong ebanghelyo usab, gipadayag sa
Dios ang bag-ong kasugoan: Paghigugmaay
kamo! Kini ang bugtong paagi sa
pagbuntog sa mga suliran, kapakyasan, kahugawan ug kadautan sa kalibutan! Ang paghigugmaay maoy magsilbing timailhan
nga kita iyang mga tinun-an. Busa angay natong hinumdoman nga ang kinauyokan sa
tibuok natong pagkatawo mao ang GUGMA.
Sukad sa sinugdanan, kining gugma ato nang
naambitan. Kay gimugna kita sa Dios nga mao ang tuburan sa gugma. Busa, matag
usa kanato aduna gayod igong katakus o kapasidad sa paghigugma. Kini mahimo
lamang kung ang atong panglantaw sibo sa panglantaw sa Ginoo. Diin alang kaniya
ang pinaka-importante og bililhong gasa mao gayud ang usa’g-usa - ug wala nay
lain pa. Mao nga ang atong manunubos
mapaubsanong minaog aron sa pagtabang o paggiya kanato sa pagdiskubre sa maong
katakos o kapasidad sa paghigugma. Makaplagan lang nato pagbalik ang kapasidad
sa pagkamahigugmaon kon ang gitagaan nato ug importansiya ug kabililhon, mao
ang atong isigka-ingon.
Sama sa istorya, nga ang mas importante ug
bililhon sa asawa mao gayud ang iyang pamilya kay sa mga bahandi sa iyang bana.
Nagatoo siya nga ang tanan adunay utlanan apan malaumon usab siya nga ang
utlanan mamahimong sukaranan sa bag-ong sinugdanan. Ang paghatag og
importansiya o bili sa isigka-ingon, maoy buhing timaan nga kita iyang mga
tinun-an.
Comments
Post a Comment